Góður vinur sagði eitt sinn að atvinnuljósmyndarar vildu bara ferðast um Ísland að vetri til. Það kann að vera mikið til í því ef marka má fjölda ljósmyndara sem við rákumst á undanfarna daga á Snæfellsnesinu. Vissulega er alltaf mikið af ljósmyndurum á ferðinni þessa dagana en þegar telja má 27 þrífætur við Kirkjufellið er komið gott. Hvort þetta voru allt atvinnuljósmyndarar skal ósagt látið en allir voru þó komnir til að mynda snjóinn.
Svarthvítir tónar allsráðandi og engir litir í boði.
Myndirnar tvær hér að ofan eru teknar með tveggja daga og tveggja mínútna millibili. Það sem er helst magnað við að taka myndir yfir vetrartímann er breytileg birtan. Vissulega er birtan breytileg yfir sumarið líka en samspil andstæðna verða mjög áberandi í marsmánuði.
Í vatnborðinu gegn Kirkjufelli hittum við Gyða tvo unga menn frá Tælandi sem sögðust vera nýútskrifaðir úr framhaldsskóla en þetta var engu að síður þriðja ferð þeirra til Íslands. Þegar við Gyða sögðum þeim að við værum Íslendingar horfðu þeir á okkur eins og við værum annarlegar geimverur enda rekast þeir sjaldan á Íslendinga á ferðum sínum um náttúruperlurnar.
Við fórum á húsbílnum að þessu sinni þar sem vindaspá var hagstæð. Það er hinsvegar ekki ráðlegt að ferðast á húsbílum sem taka á sig mikinn vind á þessum árstíma nema skoða vedur.is og vegagerd.is á korters fresti. Það er hinsvegar fátt annað í boði fyrir íslenska ljósmyndara ef ætlunin er að vera nokkra daga. Gott er að sækja í hitann eftir útiveruna og nokkrir dagar á Snæfellsnesinu myndu kosta álíka og þriggja vikna sólarlandaferð ef öll þjónusta og gisting yrði keypt.
Við rákumst á slatta af ljósmyndurum á ferð okkar um Snæfellsnesið að þessu sinni, en ef þú ert að spá í að ferðast um Ísland að vetri til er fyrst og fremst tvennt sem þarf að hafa í huga eins og áður sagði: Vedur.is og Vegagerdin.is.
